Нягледзячы на тое, што навагоднія і калядныя святы прайшлі, а ў атмасферы хоць трохі, але ўжо адчуваецца дыханне вясны, гэта зусім не повад думаць, што скончыўся час добрых спраў. Сёння ў «Гарадзенскі абласны спецыялізаваны Дом дзіцяці для дзяцей з арганічнай паразай цэнтральнай нярвовай сістэмы і парушэннем псіхікі» Гродзенскiм РУП «Фармацыя» былі перададзены тавары аптэчнага асартыменту, сабраныя ў час акцыі «Елка здароўя», якая праходзіла ў аптэках прадпрыемства. Адмыслоўцы, якія сёння наведалі Дом дзіцяці, адзначылі, што тут пануе атмасфера душэўнасці і любові, і гэта адчуваецца адразу, як толькі сюды трапляеш. У наш час у Доме дзіцяці для дзяцей з арганічнай паразай цэнтральнай нярвовай сістэмы і парушэннем псіхікі знаходзіцца 64 дзеці ва узросце да 3-х гадоў, летась 38 дзяцей з'ехалі жыць у сем'і грамадзянаў нашай краіны. Хоць Дом дзіцяці і забяспечаны ўсім патрэбным (свой басейн, кухня, гульнявая, пральня і інш.), тут працуе кваліфікаваны персанал (лекары-педыятры, неўролаг, анестэзіёлаг, рэаніматолаг, дэфектолаг і інш.), яны радуюцца кожнай аказанай дапамозе і вельмі дзякуюць усяму нашаму калектыву за карысны падарунак.