Неяк раз пад Новы год, дзяўчыны…. Не, не, не прыкідалі — гулялі! Памкнуліся мы неяк усім калектывам аптэкі (а гэта 24 чалавекі з падведамнай сеткай) думу думаць, як нам усім пры падарунках застацца і што б ніхто ў крыўдзе не быў. Думалі, думалі, дзе б нам знайсці такога шчодрага на падарункі Дзеда Марозу, ды прыдумалі ў інтэрнэце пашукаць. Знайшлі! Завецца «Таемны Санта». Сэнс просты: напярэдадні святаў мы ўсе выцягнулі паперкі з імёнамі сваіх калегаў, на аднаго чалавека адзін падарунак, а кошт кожнага падарунка абмежавалі. І разышлося ўсё абіраць падарункі. Ужо да дваццатага ліку пацягнулася чарада ў галоўную аптэку — №147, ішлі калегі, неслі падарункі і, употай, падкладалі на палічку, бо нездарма гульня завецца «Таемны Санта».
А 22 снежня апоўдні памкнулася дэлегацыя, што складаецца з дзвюх снягурак (галоўнай — загадніка аптэкі №147 Панюцінай Алены Уладзіміраўны і яе памагатай — прафгрупорга Клімук Вольгі Станіславаўны) па аптэках падаруначкі развозіць, ды калегаў са святамі віншаваць. Ох і радасці было, калі ўсе падарункі атрымалі, ды распакавалі!
З Калядамі і Новым годам, калегі!
Калектыў аптэкі №147 г.Гродна