20 снежня ў рамках правядзення круглагадовай спартакіяды сярод арганізацый горада Слоніма, на базе фізкультурна-аздараўленчага комплексу, адбыліся спаборніцтвы па плаванні. Нязменнай мэтай спартакіяды з'яўляецца актывізацыя фізкультурна-масавай, аздараўленчай і спартовай працы ў працоўных калектывах арганізацый. Паводле становішча імпрэзы ўдзельнікаў падзялілі на 6 узроставых груп з неабмежаваным лікавым складам каманды ад прадпрыемства.
Ад ЦРА №61 Слонімскага раёна традыцыйна заявіўся адзін удзельнік ва ўзроставую групу 18-25 гадоў. Для дадзенай групы прапанавалася самая доўгая дыстанцыя ў 100 метраў на «нязручнай» кароткай вадзе (4х25м). Па выніках лёсавання давялося заняць першую дарожку і прыступіць да спаборніцтва.
Змаганне на дыстанцыі было зацятым, бо ў адным заплыве бралі ўдзел 2 прызёры мінулых гадоў. Дасведчаныя супернікі і магутная падтрымка надавалі ўпэўненасці, але канчатковы вынік вызначаў апошні «басейн». Нястача сіл кампенсавалася воляй да перамогі, ці проста да годнага выніку. Выніковы час паказала 1:44:16 і трэцяе месца ў заплыве. У іншым заплыве супернікі былі блізкія, але не палепшылі дадзены вынік, таму атрымалася захаваць 3 месца.
У нефармальным становішчы атрымалася пагутарыць з удзельнікамі на тэму спорту на прадпрыемствах, якія яны ўяўляюць, і яшчэ раз пераканацца ў тым, што ў нас лепшая калектыўная дамова, і лепшая матывацыя і заахвочанне для спартоўцаў, аматараў і проста людзей падтрымных здаровы лад жыцця. На ўласным досведзе атрымалася пераканацца, што калі ўвесь час браць удзел ува ўсіх спартовых распачынаннях, то рана ці позна можна дамагчыся выніку.
На астатку хацелася ад шчырае душы павіншаваць усіх працаўнікоў нашага прадпрыемства з надыходнымі святамі і пажадаць, каб у будучым годзе ўсе нашы мары праўдзіліся.
Аляксандр Асовік,
кіраўнік аптэкі №132 г.Слонім
старшыня цэхкама